Հայաստանի գյուղատնտեսության նախարարության աշխատակազմի բուսասանիտարիայի տեսչության պետ Վռամ Գյուլզադյանը իր՝ աշխատանքից հեռանալու գլխավոր մեղավոր համարում է Գյուղատնտեսության ՕԵԿ-ական նախարար Գերասիմ Ալավերդյանին: «Դա եղել է այդ մանկամիտի եւ նրա վերադասների՝ վարչապետի եւ ՕԵԿ ղեկավար Արթուր Բաղդասարյանի ցանկությունը: Այն օրից, երբ Ալավերդյանը նախարար է նշանակվել, ինձ ասել են՝ դիմում գրի ու ազատվի, ես էլ ասել եմ՝ ոչ: Նա ինձ ազատելու հրահանգը ստացած է եկել նախարարություն»,-հայտարարեց Գյուլզադյանը: Աշխատանքից հեռացված նախկին ՕԵԿ-ականը մի շարք ուշագրավ բացահայտումներ է արել Գյուղնախարարի հետ կապված: Ստորեւ ներկայացնում եք նրա հետ զրույցը:
Պարոն Գյուրզադյան, ի՞նչն է եղել պատճառը, որ գյուղնախարարը Ձեր դեմ է տրամադրվել: Արդոք միայն Ձեր պարտականությունները թերի կատարելու հանգամա՞նքը, թե՞...:
Ես նախկինում ՕԵԿ անդամ էի, սակայն երբ Ալավերդյանը նախարար նշանակվեց, ես այլեւս ՕԵԿ-ում չէի, դուրս էի եկել: Բնական է, որ նման հարցեր պետք է առաջանային: Պլյուս նաեւ նախարարի մեծ ախորժակը: Նրան թվում էր, թե ես գյուղնախարարության մեջ մաքսային ծառայության պետ եմ եւ այստեղ մեծ գումարներ են շրջանառվում ու ինքը պետք է շատ շուտ հարստանա եւ վերադարձնի նախարար դառնալու համար արած ծախսերը: Տարի ու կես է՝ այդ կոնֆլիկտը կա, դա նոր բան չէ: Պարզապես այս անգամ նա ինձ ծուղակը գցեց եւ քաղծառայութան խորհուրդը չկարողացավ ինձ պաշտպանել:
Ի՞նչ ծուղակի մասին է խոսքը:
Օրենքով սահմանված իմ լիազորությունները նա հանձնարարեց ուրիշին՝ լիցենզավորման վարչության պետ, ՕԵԿ անդամ Տիգրան Գասպարյանին, որ գան թունաքիմիկատ վաճառող տնտեսվարող սուբյեկտների խանութներում ստուգումներ կատարեն: Գնացին, ստուգեցին, որեւէ թերություն չֆիքսեցին: Վարչապետի վերահսկողական ծառայությունը նրանց հետեւից գնաց եւ մի շարք թերություններ հայտնաբերեց, նախարարն էլ ասաց, թե ես իմ պարտականությունները լավ չեմ կատարել: Մինչդեռ ես ընդհանրապես չէի կատարել, որովհետեւ դա ուրիշին էր հանձնարարվել:
Քաղծառայությունն էլ չկարողացավ ինձ պաշտպանել, քանի որ ինձ մեկուսացնելու եւ իմ պարտականությունները ուրիշին հանձնարարելու վերաբերյալ մասին ես պարտավոր էի նախօրոք տեղեկացնել թե՜ քաղծառայությանը, թե՜ վարչապետին: Մի բան, որը ես չարեցի: Մինչդեռ առկա է հանձնարարագիրը, որում նշված է, թե տվյալ հանձնարարությունը պետք է կատարեն տեսուչը եւ լիզենզավորման վարչության մասնագետը: Եթե ես ժամանակին դիմած լինեի, կարծում եմ, քաղծառայությունն ինձ կպաշտպաներ:
Իսկ ինչո՞ւ չեք դմել:
Որովհետեւ նախարարության աշխատակազմի իմ գործընկերները՝ փոխնախարարից սկսած, բոլոր հոգնել էին իմ ու նախարարի կոնֆլիկտից եւ խորհուրդ տվեցին՝ թող մի քիչ հանգիստ մնանք, էլի, ջհանդամ թե ով ա ստուգում, ի՞նչ տարբերություն: Ես էլ հանուն իմ գործընկերների զիջեցի: Ես մարդկայնորեն ճիշտ եմ, բայց իրավական առումով թերացել եմ՝ չտեղեկացնելով վարչապետին: Եթե նույնիսկ համարենք, որ տեղի ունեցածը քաղաքական համաձայնության արդյունք է, համենայնդեպս իրավական հիմնավորումն այնպիսին է, որ ես բողոքարկել չեմ էլ ուզում: Որովհետեւ ես քաղծառայության խորհրդին ավելի եմ հավատում, քան մեր դատական համակարգին: Եթե քաղծառայությունը հնարավորություն ունենա ինձ եւ ցանկացած քաղծառայողի իրավական դաշտում պաշտպանելու, համոզված եմ, որ կպաշտպանի:
Իսկ բացի այդ, ուրիշ կոնֆլիկտներ է՞լ են եղել ձեր ու նախարարի միջեւ:
Եթե դուք թերթել եք անցած մեկուկես տարվա մամուլը, ապա տեսած կլինեք, որ ես պարբերաբար հայտարարել եմ՝ նախարարը անբուժելի հոգեկան հիվանդ է, նախարարը հիմար պահանջներ է առաջ քաշում, ուզում է, որ իր պրինցիպներով աշխատեմ, նախարարը ինձ խիստ նկատողություն է հայտարարել, գործն ուղարկել է դատախազություն, անվտանգության ծառայություն, մի անգամ էլ էր գործն ուղարկել քաղծառայության խորհորդ, որը մերժել էր…այնպես որ, երկար պատմություն է:
Պարոն Գյուրզադյան, ձեր դիտարկմամբ, ինչո՞ւ կառավարության ղեկավարը ձեր հայտարարություններից հետո միջոցներ չի ձեռնարկել նախարարի պաշտոնանկության հարցը բարձրացնելու համար, եթե նախարարը հոգեկան հիվանդ է եւ այլն…
Երբ վարչապետը ժամանակ առաջ գյուղնախարարին հրապարակավ խիստ նկատողություն հայտարարեց, դա մեր անկախ երկրի պատմության մեջ եզակի դեպք էր: Կարծում եմ, որ իրենք՝ վերեւներն էլ գիտեն, թե ինչն ինչոց է, ուղղակի ցավն այն է, որ կոալիցիոն համաձայնագիր կա եւ նախարարի տերը վարչապետը չէ: Իմ կարծիքով՝ Բաղդասարյանի մոտ այլեւս նորմալ կատեգորիայի մարդ չի մնացել, դրա համար էլ սա է դարձել նախարար: Եթե այնտեղ լուրջ մարդ մնացած լիներ, գյուղնախարարը այդ մանկամիտը չէր լինի: Ես իմ հոդվածներում էլ բազմիցս գրել եմ, որ նա մանկամիտ մեծ տղա է՝ «բալշոյ մալչիկ»: Այժմ նրա կողմից իրականացված չարաշահումների մասին: Սկսենք մորեխների դեմ պայքարի միջոցառումներից: Իմ ստուգումների արդյունքում պարզել եմ, որ մորեխների դեմ պայքարի միջոցառում անցկացնելու մրցույթը հիմնավորելու համար մոնիտորինգ է անցկացվել, որի արդյունքները, փաստորեն, կեղծ են: Պարզվել է, որ Շիրակի մարզի Ամասիայի տարածաշրջանի 3 հազար հեկտարից ավելի տարածքում մորեխ չկա: Բայց նախապես ֆիքսել էին, որ այդտեղ շատ մորեխ կա: Մրցույթ էին ակցկացրել, շահել էր, ինչպես միշտ, նույն մարդը` նախարարի յուրայինը: Եվ պետք է գնային, իբր թե, պայքար կազմակերպեին: Վերջում երեւում է, որ լավ պայքարել են ու մորեխների վերջը տվել: Հայտնաբերած փաստերի մասին համապատասխան զեկուցագիր եմ ներկայացրել նախարարի առաջին տեղակալին, կազմվել է հանձնաժողով, որը ստուգել է իր բերած տվյալները եւ պարզել, որ դրանք ճիշտ են: Հարցը փակվեց, իսկ մոնիտորինգ անցկացնողը որեւէ մի տույժի չենթարկվեց: Երեք հազար հեկատարի համար հատկացվել էր մոտ 18 միլիոն դրամ փող, որը պետք է հայտնվեր մեկ-երկու մարդու գրպանում:
Լուրեր են շրջանառվում, որ ձեր դեմ իրականացվող կոմպանիայի պատճառն այն է, որ դուք անդամակցել եք ՀՀԿ-ին: Ճի՞շտ է:
Ճիշտ չէ: Ես ՕԵԿ-ից դուրս եմ եկել գիտե՞ք երբ…էն որ ՕԵԿ-ից փախչում էին, ես չեմ փախել եւ ինձ այս պաշտոնին նշանակել է լուսահոգի Անդրանիկ Մարգարյանը: Ես ՕԵԿ անդամ եմ եղել եւ ինձ չեն ասել՝ դու ՕԵԿ ես, քեզ չի կարելի պաշտոն տալ: Ես մնացել եմ ՕԵԿ-ում մինչեւ այն ժամանակ, մինչեւ հեռուստատեսությամբ Ռոբերտ Սեդրակիչը մեղադրեց Արթուր Բաղդասարյանին դավաճանության մեջ: Ես այդ ժամանակ եմ դուրս եկել ՕԵԿ-ից եւ ասել եմ՝ ես ձեզ հետ ճանապարհ չունեմ գնալու: Ես հայրենասեր մարդ եմ, իմ համար նախագահը թագավոր է, անկախ այն բանից, թե նա ով է՝ Լեւոն Տեր-Պետրոսյանը, Ռոբերտ Քոչարյանը թե Սերժ Սարգսյանը: Իմ համար նախագահը թագավոր է, եւ եթե թագավորը մեկին բնութագրում է որպես դավաճան, ես այդ մարդու հետ ճանապարհ չունեմ գնալու: Իսկ ՀՀԿ-ին ես անդամակցել եմ Սերժ Սարգսյանի նախընտրական արշավի ժամանակ: Ինքս էլ գնացել դիմում եմ գրել: Ես նատուրայով այնպիսի մարդ եմ, որ չեմ կարող մենակ ստվերում քայլել:
Պարոն Գյուրզադյան, խոսք էր գնում նաեւ ինչ-որ պատգամավորի մասին, ում հետ դուք հակասություն եք ունեցել եւ դա էլ դարձել է ձեր հեռացման պատճառներից մեկը:
Ես որեւէ պատգամավորի հետ հակասություն չեմ ունեցել եւ դա չէր կարող իմ հեռացման պատճառը դառնալ: Պատգամավորներից մեկի աղջիկը ապրանք բերելու ժամանակ տեսուչի հետ կոնֆլիկտ է ունեցել: Բայց դա չի էլ քննարկվել, որեւէ մեկի հետ նման տիպի խոսակցություն չի էլ եղել: Եւ դա այնքան մանր հարց է, որ չէր կարող իմ պաշտոնանկության պատճառը դառնալ:
Լավ, իսկ ինչպե՞ս է ծավալվելու ձեր հետագա գործունեությունը:
Ես քաղծառայողի աշխատավարձով չեմ ապրել: Ես հողագործությամբ եմ զբաղվել, շարունակելու եմ ֆերմերությունը: Մինչեւ հիմա աշխատել եմ գյուղատնտեսության բնագավառի հասարակական կազմակերպությունների հետ՝ տիկին Ռոզա Ծառուկյանի եւ այլոց հետ: Ես իմ գործունեությունը շարունակելու եմ ֆերմերության բնագավառում, մինչեւ որ կրկին մրցույթ կհայտարարվի եւ կրկին կմասնակցեմ:
Պետական կառավարման համակարգում կա՞ մի պաշտոն, որը կցանկանայիք զբաղեցնել, թեկուզ գյուղնախարարությունում:
Ոչ, իմ նախկին պաշտոնը միակ տեղն է, որտեղ ես կուզեի կրկին աշխատել կիսատ թողած գործը շարունակելու համար, նաեւ ապացուցելու, որ մի դրվագով աշխատանքի բնութագիր տալն այնքն էլ լուրջ մոտեցում չէր: Իհարկե, եթե մրցույթում հաղթեմ՝ կշարունակեմ աշխատել, չեմ անցնի՝ չեմ աշխատի: Կպատրաստվեմ 2012 թվականի խորհրդարանական ընտրություններին:
ՀՀԿ-ի ցուցակո՞վ:
Իհարկե: դա արդեն կուսակցությունը կորոշի՝ որտեղ է ինձ տեսնում, կամ չի տեսնում: Ես երկու անգամ մեծամասնականով պատգամավոր եմ ընտրվել: Առաջին անգամ՝ որպես անկուսակցական, երկրորդ անգամ՝ ՕԵԿ-ի ցուցակով: Եւ իմ կարծիքով ես ավելի շատ օգուտ եմ տվել այդ ընտրարշավում ՕԵԿ-ին, քան ՕԵԿ-ը ինձ:
Զրուցեց Հեղինե Մանուկյանը
