Սերժ Սարգսյանի գործերի կառավարչի տեղակալ Վարուժան Գրիգորյանը, Կենտրոն եւ Նոր-Մարաշ վարչական շրջանների ընդհանուր իրավասության դատարանում որպես վկա հանդես գալով, մի շարք ինքնախոստովանական ցուցմունքներ է տվել: ՀՀ ՊԵԿ նախագահ Գագիկ Խաչատրյանի դեմ 2009-ի մայիսին մահափորձ կազմակերպելու մեջ մեղադրվող Գագիկ Մաթեւոսյանը եւ եւս 5 անձինք մեղադրվում են նաեւ «Փեթակ» տոնավաճառի տիրոջ տունը թալանելու փորձ կատարելու մեջ: Այս գործով սեպտեմբերի 10-ի դատական նիստում, որպես «Փեթակի» տեր, ցուցմունք է տվել հենց Վարուժան Գրիգորյանը: Սակայն, երբ դատավոր Գագիկ Ավետիսյանը նրան հարցրել է, թե ի՞նչ կապ ունի «Փեթակի» հետ, Գրիգորյանը պատասխանել է. «Դե, երբ պետական պաշտոնի պիտի նշանակվեի, տոնավաճառը գրեցինք աղջկաս անունով, որովհետեւ ինձ չէր կարելի բիզնեսով զբաղվել, բայց դե տերը ես եմ»: Ի դեպ, Գրիգորյանն ի պաշտոնե զբաղված է նախագահականի նյութական մատակարարմամբ:
No comments:
Post a Comment