Մոտ 2 ամիս է՝ խոսակցություններ են շրջանառվում, թե Ռուսաստանի Դաշնությունը վերաբնակեցման ծրագրի շրջանակներում Հայաստանի քաղաքացիներին բավական ձեռնտու պայմաններ առաջարկելով՝ տեղափոխում է Ռուսաստանի մարզեր, այնտեղ բնակարան, ֆինանսներ և ՌԴ քաղաքացիություն է տրամադրում։ Լրագրողների հետ հանդիպման ժամանակ այդ խնդրին անձրադարձել են նաև «Սարդարապատ» շարժման նախաձեռնող խմբի անդամներ Ժիրայր Սէֆիլյանը, Ալեք Ենիգոմշյանը, Տիգրան Խզմալյանն ու Հարություն Մեսրոպյանը՝ ահազանգելով, թե Հայաստանի իշխանությունները Ռուսաստանի իշխանություններին խնդրել են այդ գործունեությունը հնարավորինս անաղմուկ իրականացնել, և որ այդ ծրագրի շրջանակներում արդեն Հայաստանի 4808 քաղաքացի ՀՀ-ից հեռացել է։ Առավել մանրամասն տեղեկությունների համար «7օր»-ը դիմել է ՀՀ տարածքային կառավարման նախարարության միգրացիոն ծառայություն։ Պետի տեղակալ Իրինա Դավթյանը պատասխանել է, որ տեղեկություններ ստանալու համար պետք է կապ հաստատել Ռուսաստանի միգրացիոն դաշնային ծառայության հայաստանյան ներկայացուցչության հետ, քանի որ հենց իրենք էլ իրականացնում են հավաքագրումը։ Վերջինի ղեկավարը, սակայն, հրաժարվել է հեռախոսով պատասխանել մեր հարցերին՝ նշելով, թե հոկտեմբերի 2-ին Մոսկվայի տանը վերաբնակեցման այդ ծրագրի առնչությամբ լայնամասշտաբ հանդիպում է տեղի ունենալու։
No comments:
Post a Comment