Մի քանի օր առաջ Գյումրիի քաղաքապետ Վարդան Ղուկասյանը տնտեսական և քաղաքական գիտությունների պատվավոր դոկտորի կոչում է ստացել բազմաթիվ արժանիքների, այդ թվում` նաև Գյումրիում «դեմոկրատիայի բարձր մակարդակ ապահովելու» համար: Ինքը` պրն Ղուկասյանը, հայտարարել է, թե պատահաբար է իմացել իր նոր կոչման մասին: Խնդիրը միայն այն չէ, որ Վարդան Ղուկասանը վաղուց արդեն ակադեմիկոսի կոչում էլ ունի, կազակական զորքերի ատամանի կոչում էլ, ասում են նույնիսկ «գժի թուղթ» էլ: Եթե այսպես շարունակվի, պրն Ղուկասյանը մի օր էլ կարող է պատահաբար պարզել, որ իրեն պատվավոր տիեզերագնացի կամ ջրացատկի սպորտի վարպետի կոչում են տվել: Խնդիրն այն է, որ նա, բանից պարզվում է, Գյումրիում «դեմոկրատիայի բարձր մակարդակ է ապահովում»: Այդ բարձր մակարդակի շնորհիվ է երևի, որ Հայաստանի երկրորդ քաղաքում այդքան հաճախ են իրար վրա կրակում ու սպանում պատահական անցորդներին: Եվ ընդհանրապես` իսկական դեմոկրատիան հենց այն է, որ «նաչալնիկին» անկապ կոչումներ ու մեդալներ են շնորհում: Բա ուրիշ ինչպե՞ս արտահայտել «ժողովրդի անսահման սերը իմաստուն առաջնորդի նկատմամբ»:
No comments:
Post a Comment