Մոսկվայի քաղաքապետ Յուրի Լուժկովը 2008թ. ՌԴ նախագահ Դմիտրի Մեդվեդևին հրաժարականի դիմում է ներկայացրել, սակայն երկրի ղեկավարը չի ընդունել այն: Այս մասին The New Times անսագրին տված հարցազրույցում պատմել է Լուժկովի կինը՝ «Ինտեկո» ընկերության նախագահ Ելենա Բատուրինան: Հրաժարականի դիմում Լուժկովը ներկայացրել էր այն բանից հետո, երբ 2008թ. նոյեմբերին Կրեմլը քննադատել էր քաղաքագլխին՝ նահանգապետերի ընտրովի լինելու կարգին վերադառնալու անհրաժեշտության վերաբերյալ հայտարարության համար: Լուժկովն իր հայտարարությունն արել էր Առաջին ալիքի եթերում, ինչից հետո նախագահի մամուլի ծառայությունը մեկնաբանություն էր տարածել, որում նշվում էր. «Դժգոհ նահանգապետերը կարող են հրաժարական տալ»: Բատուրինան պատմել է, որ դրանից հետո Լուժկովը հավաքել է իր ամբողջ ընտանիքը և ասել, որ դա իր համար պատվի հարց է և որ ինքը հետ չի կանգնի նահանգապետերի ընտրովի համակարգին անցնելու անհրաժեշտության վերաբերյալ իր տեսակետից: «Քաղաքապետը գնաց նախագահի մոտ դիմումով, ինչին ի պատասխան Մեդվեդևն ասաց, որ ինքը նկատի ուներ բոլորովին այլ մարդկանց, և որ ինքը դժգոհություն չունի քաղաքապետից, թող հանգիստ աշխատի»,- նշել է Բատուրինան: Ամսագրին հարցազրույցը Բատուրինան տվել է Ավստրիայում Skype-ով: Ավստրիայում է նաև Լուժկովը, որն արձակուրդում սեպտեմբերի 21-ին կնշի իր ծննդյան 74-ամյակը:
No comments:
Post a Comment