Երվանդ Զախարյանի կադրերից մեկի

Համակարգի «մաքրման» պրոցես է ընթանում ոչ միայն վերին օղակներում, այլ նաեւ՝ ներքին: Օրերս պաշտոնական դիրքի չարաշահման համար քրեական գործ է հարուցվել Կադաստրի Իջեւանի տարածքային ստորաբաժանման պետ Կոլյա Խաչատրյանի նկատմամբ: Գործն ուղարկվել է դատարան: Թերթը նշում է, որ Կադաստրն ինչպես Հայաստանում, այնպես էլ Իջեւանում համարվում է ամենակոռումպացբված հիմնարկներից մեկը:

Ինչո՞ւ է հայը բախումներին մասնակցում ռուս ազգայնականների կողմից

Բոլորը գիտեն, որ Ռուսաստանում «Նաշի» (ռուսերենից թարգմանաբար նշանակում է մերոնք) երիտասարդական շարժումը 2005 թ. ստեղծվել է Կրեմլի կողմից, իսկ նրա գործունեությունը համակարգվում է ՌԴ նախագահի աշխատակազմի ղեկավարի տեղակալ Վլադիսլավ Սուրկովի կողմից: 

Եվ ահա, «Независимая газета» թերթը պարզել է, որ վերջերս Մոսկվայում և այլ քաղաքներում տեղի ունեցած բախումների ժամանակ, որոնք հրահրվել էին ազգայնականների կողմից, մասնակցել են նաև «նաշիստները»: Ընդ որում, որքան էլ տարօրինակ է, բայց կովկասցիների դեմ բախումները հրահրվել են նաև հայազգի Լևոն Արզումանյանի կողմից, որը երիտասարդական վերոնշյալ կազմակերպության ակտիվ անդամներից է: Բլոգերներին հաջողվել է «В контакте» սոցիալական ցանցում գտնել նրա անձնական էջը, որտեղ նա հպարտանում է իր արարքներով: Բացի այդ, կան նաև տեսագրություններ, որտեղ նա նացիստական ողջույնի ժեստով ողջունում է հակակովկասյան բախումների դուրս եկած ազգայնականներին, ինչպես նաև պատկերներ, որտեղ նա զբոսնում է Մոսկվայի ոստիկանության վարչության պետ Վիկտոր Բիրյուկովի հետ: «Նաշի» երիտասարդական շարժումը հրաժարվում է իր «անառակ որդուց», սակայն սա եզակի դեպք չէ:Մի քանի օր առաջ էլ բլոգերները հայտնաբերել էին, որ բախումներին մասնակցել է նաև Տամբով քաղաքի «Նաշի» շարժման տարածքային կառույցի ղեկավար Նիկոլայ Մակարովը:

Շուտով միտքը կփոխարինի մկնիկին

Կառավարել համակարգիչը միայն մտքի օգնությամբ. դրա մասին երազում էին նույնիսկ գրող-ֆանտաստները: Այնուամենայնիվ կանադական Interaxon ընկերությունը մտադիր է մոտակա տասնամյակներում շուկա հանել նմանատիպ տեխնոլոգիա:

Ինչպես գրել է The Wall Street Journal-ը երկուշաբթի օրը, Interaxon-ի գյուտի շնորհանդեսը հիմնված մարդու ուղեղի ազդանշանների ստացման, վերլուծման և փոխանցման վրա դարձավ «Le Web» կոնֆերանսի ամենահետաքրքիր նորարարություններից մեկը, որը տեղի է ունեցել անցյալ շաբաթ Փարիզում: Համակարգը ներկայացրել է Interaxon ընկերության տնօրենը` 31-ամյա Արիել Գարտենը: Շնորհանդեսի ընթացքում նա ցուցադրեց մի սարք, որն ամրացվում էր ճակատին և որը կարդում էր մարդու ուղեղից արձակված ալֆա և բետա ազդանաշանները (երկու ազդանշանն էլ մշտական գոյություն ունեն և կապված են նրա հետ, թե մարդու ուղեղը այդ պահին հանգի՞ստ, թե՞ կենտրոնացման փուլում է): Արդյունքում` որքան փորձարկմանը մասնակցած կինն ավելի կենտրոնացած էր լինում, այնքան ավելի արագ էր շարժվում օբյեկտը iPad պլանշետի էկրանին: Գարտենի խոսքերով, սովորել կառավարել ուղեղն նույնքան հեշտ է, որքան մկնիկի օգնությամբ համակարգչի կառավարումն է: Ներկայումս Interaxon ընկերությունն աշխատում է վերծանել մարդու ուղեղի մյուս ազդանշանները և դրանք հեշտությամբ փոխանցել համակարգչին: Interaxon-ի հիմնադիրները կարծում են, որ տվյալ համակարգը մոտակա 10 տարիներին մեծ տարածում կգտնի և կփոխարինի ոչ միայն մկնիկին, այլ նաև ձայնային ազդանշաններով բջջային հեռախոսների կառավարմանը: Ճիշտ է, Գարտները նշում է, որ ուղղակիորեն կարդալ մարդու մտքերը համակարգիչը մոտակա տարիներին չի կարողանա. օրինակ` մտքումդ պահած կապույտ գույնով չես կարող կապտացնել համակարգչի էկրանը: Այդ արդյունքին հասնելու համար, նրա կարծիքով, անհրաժեշտ է առնվազն 20 տարի:

ԿԱՄ ԱՎԱՆԱԿԸ ԿՍԱՏԿԻ, ԿԱՄ ՏԵՐԸ

ԱԺ անկախ պատգամավոր Վիկտոր Դալլաքյանը ելույթ ունեցավ Կենսաթոշակների մասին օրենքի վերաբերյալ` հայտարարելով, որ ինքը դեմ է քվեարկելու այս նախագծին:
- Արդյոք 2010թ. կառավարությունն իրավունք ունի կանխորոշել 2014 թ. կառավարության գործունեությունը, կենսաթոշակի համակարգը: Հեռետորական հարց` իսկ դուք լինելու եք իշխանության, որ այսօր նման հարց եք բարձրացնում: Իմ գնահատականով չի կարելի հիմիկվանից կանխորոշել 2014թ. քաղաքականությունը: Ես սա գնահատում եմ ոչ կոռեկտ,- հայտարարեց Դալլաքյանը: Նա նաեւ հարցրեց, արդյոք միջին 25 հազար դրամ կենսաթոշակով խորհրդարանում նստածները կկարողանան ապրել, վճարել կոմունալ ծառայությունների համար, երբ նվազագույնն անհրաժեշտ է 70 հազար դրամ ապրելու համար: Դալլաքյանը նաեւ ասաց, որ Կենսաթոշակի` պարտադիր կուտակային ֆոնդի գաղափարը Չիլլիում տապալվել է: Ու հիմա, ըստ Դալլաքյանի, կառավարությունը 530 հազար թոշակառուի վրա էքսպերիմենտներ է կատարում: - Այս մոտեցման դեպքում կամ ավանակը կսատկի, կամ` ավանակի տերը,- ասաց Դալլաքյանը` հավելելով, որ կուտակային կենսաթոշակային համակագին սպառնում է ավանդների ճակատագիրը, երբ մասնավոր բանկերի փակվելուց հետո մարդիկ այլեւս չգիտեն` ումից պահանջեն գումարները: Իսկ դաշնակցական Արա Նռանյանը հավելեց, որ կառավարությունը ոչ թե 530 հազար թոշակառուի վրա է էքսպերիմենտ անում, այլ` ողջ ժողովրդի վրա:

Սկսվել է «Լեզվի մասին» օրենքի երկրորդ ընթերցումը

Խորհրդարանը սկսեց վերջապես քննարկել «Լեզվի մասին» և «Հանրակրթության մասին» օրենքներում փոփոխություններ կատարելու մասին օրինագծի երկրորդ ընթերցումը: Հանրակրթության մասին օրենքում նախատեսվում է փոփոխություն և այնտեղ ներմուծել այլընտրանքային` փորձարարական, միջազգային, հեղինակայնին, կրթական ծրագրերի հասկացությունները: ՀՀ կրթության և գիտության նախարար Արմեն Աշոտյանը հայտարարել է, որ օրինագիծը բացարձակապես քաղաքականացված չէ, արտաքին և ոչ էլ այլ տեսակի քաղաքական պատվերներ չկան: Ի դեպ, օրինագծի քննարկումն անցել է բավականին բուռն մթնոլորտում, «Ժառանգություն» խմբակցության պատգամավորները տեղից պարբերաբար ընդհատել են Ա. Աշոտյանի ելույթը, ինչին ի պատասխան` նա նկատել է, որ իր որոշ գործընկերների մոտ ոչ միայն տարրական կրթության բացակայություն կա, այլ նաև` տարրական դաստիարակության: «Սա «Լեզվի մասին» օրենքի քննարկում էլ չէր իրականացված, որի ականատեսը մենք եղանք: Սա «Լեզվի մասին» օրենքի շուրջ քննարկումներ էին, որտեղ կային հստակ շահեր, շահարկումներ, պատվիրատուներ, կատարողներ, դերակատարներ, խամաճիկներ, և ցավոք սրտի, այս ամենը թույլ չտվեց, որպեսզի մենք ձեզ հետ միասին կենտրոնանայինք և իրականում շատ ավելի շատ ժամանակ հատկացնեինք բովանդակային քննարկումներին»,- հայտարարել է Ա. Աշոտյանը՝ ընդգծելով, որ պետք է վերջակետ պետք է դրվի բոլոր տեսակի շահարկումներին, դպրոցները կբացվեն և կաշխատեն: Նախագծի քննարկումները կշարունակվեն վաղը:

ՀԱՍՏԱՏՎԵԼ Է

Քիչ առաջ ավարտվել է ՀՀԿ Խորհրդի նիստը, որի ընթացքում կայացվել է որոշում, համաձայն որի վաղը` դեկտեմբերի 17-ին Երեւանի Ավագանու նիստում ՀՀԿ խմբակցությունը Երեւանի քաղաքապետի համար կառաջադրի Հայռուսգազարդ ընկերության գործադիր տնօրեն Կարեն Կարապետյանի թեկնածությունը: Դրանից բացի, ՀՀԿ Խորհուրդը որոշել է, որ արդարադատության նախարարի պաշտոնում կնշանակվի Հրայր Թովմասյանը, իսկ էկոնոմիկայի նախարար Ներսես Երիցյանը այլ աշխատանքի անցնելու կապակցությամբ կթողնի պաշտոնը: Նրա փոխարեն, ՀՀԿ Խորհրդի որոշմամբ, էկոնոմիկայի նախարար կդառնա ֆինանսների նախարար Տիգրան Դավթյանը, իսկ Տիգրան Դավթյանի փոխարեն ֆինանսների նախարար կդառնաԿենտրանական բանկի փոխնապագահ Վաչե Գաբրիելյանը:

Սոմալիից ու Իրաքից մի քիչ առաջ ենք

«Սարդարապատ» շարժման նախաձեռնած քննարկման ժամանակ, խոսելով կոռուպցիոն երևույթների մասին, «Թրանսփարենսի ինթերնեշնլ» հասարակական կազմակերպության տնօրեն Վարուժան Հոգտանյանն ասաց, որ կան վարչական և քաղաքական կոռուպցիայի տեսակներ: Եթե վարչական կոռուպցիան դրսևորվում է վարչական ռեսուրսները գործադրելով, ապա քաղաքական կոռուպցիան, ըստ Վ. Հոկտանյանի, դրսևորվում է ընտրությունները կեղծելով: Վարուժան Հոկտանյանն ասաց նաև, որ քաղաքական կոռուպցիայի դրսևորում է, երբ խորհրդարանում ընդդիմադիր պատգամավորներին կաշառում են և տեղափոխում իշխանամետ խմբակցություն: Նա բերեց Ուկրաինայի օրինակը, երբ Վ. Յանուկովիչը ընտվեց նախագահ, ընդդիմադիր շատ պատգամավորներ կաշառվեցին և դուրս եկան իրենց հարազատ խմբակցությունից: Վարուժան Հոկտանյանը նշեց նաև «պետության զավթման» մասին: Ըստ Վարուժան Հոկտանյանի` կոռուպցիոն այդ երևույթը դրսևորվում է այն դեպքում, երբ խորհրդարանականները, կառավարությունը ընդունում են այնպիսի օրենքներ և ենթաօրենսդրական ակտեր, որոնք նյութական առավելություններ են տալիս որոշակի ֆինանսաօլիգարխիկ խմբերի: «Եթե ընդունվում է օրենք, որի արդյունքում, օրինակ, որոշ ներմուծողներ ստանում են առավելություններ, դա կոռուպցիոն երևույթ է»,- ասաց Վարուժան Հոկտանյանը: «ԹԻ» գործադիր տնօրենը նշեց, որ կոռուպցիայի տեսակներ են կաշառակերությունը, շորթումը, բյուջեի թալանը, պետության զավթումը: «ԹԻ» տնօրենը նշեց, որ մարդիկ շատ հաճախ խուսափում են ասել, որ իրենք կաշառք են տվել, քանի որ դա հանցագործություն է: Կոռուպցիայի համաթվով, ըստ Վարուժան Հոկտանյանի, Հայաստանը մինչև 2007 թ. զբաղեցնում էր երրորդ տեղը այն սանդղակում, որտեղ 0-ն համարվում էր բացարձակ կոռումպացվածության չափանիշ, իսկ 10-ը` կոռուպցիայի բացակայության չափանիշ: «ԹԻ» տնօրենը նշեց, որ բացարձակ չկոռումպացված երկիր չկա, և լավագույն ցուցանիշներով աչքի են ընկնում Դանիան, Նոր Զելանդիան, Սինգապուրը: Փոխարենը ամենակոռումպացվածն են համարվում Իրաքը, Սոմալին, Աֆղանստանը: Վարուժան Հոկտանյանը նշեց, որ Հայաստանը նահանջ է արձանագրել` կազմելով 2,6: Վարուժան Հոկտանյանը նշեց, որ իրենց հարցումների արդյունքում պարզվել է, որ 53 տոկոսը կարծում է, որ կառավարությունը ոչինչ չի անում կոռուպցիայի դեմ պայքարելու համար: Նա ասաց, որ Հայաստանում կոռուպցիան համակարգային երևույթ է: «ԹԻ» տնօրենը նշեց նաև, որ մեր երկրում կոռուպցիան հնարավոր չի լինում կանխարգելել, քանի որ գործում են Արևմուտքից վերցված մոդելային օրենքները, որոնք չեն տեղայնացվում: Որպես կոռուպցիայի պատճառ` նա նշեց, որ Հայաստանում առկա է քաղաքական և տնտեսական մոնոպոլացումը, երբ չկան մրցակցային պայմաններ: Վարուժան Հոկտանյանը կոռուպցիայի համակարգային լինելը բացատրեց նրանով, որ գործում է բուրգ, որի գագաթին և ստորին շերտում գտնվողները հանցակիցներ են: «Երբ կոռուպցիան հանում ես այդ համակարգից, համակարգը փուլ է գալիս»,- ասաց նա: